Blertina Koka / Shëndeti Online dhe gazeta Shëndet+
Nga muaji shkurt, në Tiranë e më pas në të gjithë vendin do të nisë aplikimi i recetës elektronike. Por, cila është rruga që duhet ndjekur për përfitimin e saj?
Pacienti drejtohet tek mjeku i familjes me kartën e shëndetit për të marrë recetën me rimbursim.
Mjeku i familjes identifikon pacientin nëpërmjet kodit unik të identifikimit dhe ka akses në të gjithë historikun e mjekimeve të marra prej tij, element i cili e lehtëson mjekun në përcaktimin e terapisë medikamentoze, shkruan Shëndeti Online.
Gjatë përpilimit të një recete të re mjeku përcakton tipin e recetës, nëse ka apo jo ndryshim terapie, periudhën e mjekimit dhe përcakton diagnozën sipas sistemit të referimit. Barnat e përshkruara në recetën me rimbursim janë sipas protokollit të trajtimit të fondit për diagnoza apo kod diagnoze respektive.
Mjeku zgjedh barnat sipas principit aktiv dhe forma e dozës përcakton terapinë, sasinë, kohëzgjatjen dhe mënyrën e marrjes së këtij bari.
Receta e përshkruar konfirmohet nga mjeku dhe, për herë të parë, duke përdorur nënshkrimin elektronik sipas legjislacionit në fuqi bëhet e vlefshme si dokument shëndetësor, duke eliminuar në këtë mënyrë printimin e recetës, firmosjen dhe vulosjen e saj. Mjeku i jep pacientit kodin 5-shifror që identifikon recetën e sapopërshkruar për ekzekutimin e kësaj recete në farmaci.
Për pacientët kronikë, në rast se nuk ka ndryshim terapie, receta e mëparshme ripërshkruhet duke vendosur numrin e ri të vizitës, konfirmuar dhe nënshkruar atë.
Çfarë ndodh me farmacistët?
Farmacisti identifikon pacientin me kartën e shëndetit dhe recetën me kodin 5-shifror dhe nis ekzekutimin e saj sipas barnave të përshkruara në recetën me rimbursim. Për çdo princip aktiv të përshkruar nga mjeku, pacienti informohet paraprakisht nga alternativat e disponueshme dhe bashkëpagesën për secilin bar nëse ka, dhe përzgjidhet alternativa sipas preferencës së pacientit. Pas ekzekutimit të recetës, farmacisti konfirmon recetën.
