Për gazetën “Shëndet+” dhe Shëndeti Online: Esmeralda Runa, gastrohepatologe pranë Qendrës së Specialiteteve nr.3, Tiranë
Sëmundja e refluksit gastro-ezofageal është sëmundja më e shpeshtë e ezofagut dhe ka të bëjë me rikthimin e sekrecioneve të stomakut në ezofag. Prezantimi më tipik i kësaj sëmundje është djegia e kraharorit dhe rikthimi i aciditetit në ezofag. Ky rikthim ndodh si pasojë e humbjes së tonusit të sfinkterit të poshtëm gastro-ezofageal, që ndodhet pikërisht në vendbashkimin e ezofagut me stomakun.
Ky sfinkter ka rolin e një valvule funksionale e cila hapet sa herë ne ushqehemi ose pimë diçka. Në rastin e humbjes së tonusit të kësaj “valvule”, kjo do të ngelet e hapur për një kohë të gjatë dhe lëngjet gastrike do të rikthehen mbrapsht në ezofag.
Si shkaktarë të tjerë mund të listojmë dhe mënyrën e jetesës, ushqyerjen, duhanin, alkoolin, obezitetin.
Ankesat më të shpeshta të pacientëve
Ankesa më e shpeshtë e pacientëve është ndjenja e djegies në stomak. Ankesa të tjera janë: djegie në gjoks (retrosternale), thartirë dhe erë e keqe në gojë, fryrje, ndjenjë e mbytjes, sidomos pas ushqimit ose natën, nëse pacienti ushqehet pak para gjumit, shtrëngim i kraharorit, rrahje të shpeshta të zemrës, vështirësi gjatë frymëmarrjes etj.
Të gjitha këto simptoma ndikojnë në cilësinë e jetës, ndërkohë që në faza më të avancuara mund të na shfaqet edhe astma alergjike, prishja e dhëmbëve, sinuziti kronik etj.
Ku e hasim më shpesh?
Refluksi prek kryesisht moshat e thyera dhe sidomos pacientët me hernie hiatale.
Ushqimet që shkaktojnë refluks
Persona të ndryshëm ndikohen në mënyrë të ndryshme nga i njëjti produkt, ndaj një person me refluks të jetë në gjendje ta përcaktojë vetë ditën e tij, duke njohur ushqimet që e dëmtojnë, për t’i shmangur ato nga dieta. Një listë të atyre produkteve që e shtojnë refluksin mund të përmendim: agrumet, domatet, erëzat, mishin e yndyrshëm, cigaren, alkoolin, pijet me gaz, kafeinën, çokollatën etj.
Diagnostikimi i refluksit
Ekzistojnë shumë metoda për diagnostikimin e refluksit. Gastroskopia, manometria janë metoda që duhet të aplikohen tek çdo pacient që ka refluks kronik dhe sidomos në periudhën e përgatitjeve preoperatore tek ato pacientë për të cilët planifikohet kirurgji laparaskopike.
Trajtimi i refluksit
Ekzistojnë 4 metoda për trajtimin e refluksit. Zgjedhja e metodës së trajtimit bëhet nga mjeku juaj, sipas shkallës së refluksit dhe përparimit të sëmundjes.
– Ndryshim i mënyrës së jetesës
– Trajtim medikal (me ilaçe)
– Trajtim kirurgjikal
– Trajtim endoskopik
