Përgatiti: Elena Beta
Në shumicën e vendeve perëndimore karcinoma e prostatës është një nga tumoret më të shpeshta të seksit mashkullor. Kohët e fundit vihet re një shtim i incidencës së karcinomës së prostatës, që aktualisht në vendet perëndimore zë vendin e dytë ndërmjet tumoreve të seksit mashkullor.
Në vendet e Komunitetit Evropian incidenca e karcinomës së prostatës është 55 raste në 100.000 banorë dhe mortaliteti është 22,6 vdekje për 100.000 banorë.
Fituesi i disa çmimeve ndërkombëtare, aktori Robert De Niro është një nga personat e famshëm hollivudianë të diagnostikuar me kancer në prostatë. Kjo diagnozë u bë shkak për shumë artikuj apo biseda në botën e artit. Mjekët thanë në atë kohë se sëmundja u kap në fazat e para të saj dhe kjo e bëri më të lehtë kurimin. De Niro u operua rreth një dekadë më parë dhe tashmë gëzon shëndet të mirë. Në një intervistë të disa ditëve më parë, ai thotë se nuk e ka problem plakjen. “Jeta është e tillë, – thotë ai. – Je i ri dhe më pas vijon të plakesh”.
Një nga pikat që ka ngjallur debat në publik është kujdesi që duhet të tregojnë meshkujt për të parandaluar shfaqjen e kancerit në prostatë, duke bërë analizat e nevojshme kur ata kalojnë të 50-tat.
Tumori i prostatës shpesh zbulohet nga një ekzaminim klinik me anë të eksplorimit digital rektal apo edhe nga niveli i lartë i PSA-së. Kur dyshohet për një tumor të prostatës, ai duhet të konfirmohet me anë të biopsisë. Sigurisht ka edhe ekzaminime të tjera.
Shumë nga aktorët e Hollivudit e inkurajuan De Niron duke thënë se kishin besim se trupi i tij i fortë do ta mposhtte sëmundjen.
