Mungesa e aktivitetit fizik, qëndrimi në celular për një kohë të gjatë, çantat e shkollës dhe faktorë të tjerë kanë bërë që përgjatë viteve të fundit të rriten rastet e skoliozës, tek fëmijët e moshës 10 -17 vjeç.
Sipas specialistëve të fushës, pavarësisht problemit shqetësues, sfidë mbetet diagnostikimi i hershëm i rasteve dhe më tepër kujdes nga ana e prindërve për të parandaluar agravimim e rasteve për të cilat nevojitet ndërhyrje kirurgjikale.
“Një dhimbje muskulare është ajo që bën prindin të shkojë te specialisti dhe në disa raste fëmija diagnostikohet me skoliozë. Gjëja kryesore është që prindërit nuk duhet të alarmohen kur fëmijët preken me skoliozë. Është e rëndësishme koha e diagnostikimit sepse na jep mundësi ta menaxhojmë lehtësisht“, tha fizioterapisti Gerald Gorari për TCH.
Edhe pse në Korçë nuk ka statistika për rastet e fëmijëve të prekur nga skolioza, specialistët pranojnë se rastet janë shtuar ndjeshëm.
