Ngjarja ka ndodhur rreth orës 08:00 të mëngjesit të 6 gushtit në qëndrën shëndetësore të fshatit Fan të Mirëditës. Infermierja Mira Prenga ka pritur derisa drejtori i kësaj qendre shëndetësore të hyjë brenda në zyrën e tij dhe menjëherë ka nxituar për ta takuar. Mësohet se infermieres i ishin hequr ditët e punës nga drejtori Gjon Lleshi, pasi sipas këtij të fundit, ajo ishte larguar para kohe nga puna dhe kishte ardhur me vonesë në punë.
Sapo janë përballur në zyrë, kanë nisur debatet midis tyre. Kreu i qendrës shëndetësore i ka kërkuar Mirës të dilte nga zyra, për shkak edhe të fjalorit të papërshtatshëm dhe ofendues ndaj tij. Kjo ka bërë që situata të agravojë dhe për pasojë Mira Prenga (sipas policisë) ka marrë në dritaren e zyrës së drejtorit një vazo me lule dhe më pas ia ka përplasur në kokë. Për pasojë, Gjon Lleshi ka pësuar dëmtime në kokë, hundë e fytyrë dhe është mbuluar nga gjaku.
Kaq ka mjaftuar që lleshi të ngrihet nga karrigia e të godasë me grushte e shkelma vartësen e tij, duke i shkaktuar asaj fraktura në kokë e trup. Ulërimat në zyrën e drejtorit kanë alarmuar punonjësit e tjerë të qëndrës shëndetësore, të cilët kanë ndërhyrë që t’i ndanin.
