Problemi kryesor me të cilin përballen shumica e vendeve në botë, në këtë fazë të pandemisë me COVID-19, është niveli i ulët i vaksinimit të popullatës, i pamjaftueshëm për ta ndaluar përhapjen e virusit dhe kthimin e jetës në normalitet. Për ta arritur këtë nevojitet imunizim i popullatës.
Shumica e të rinjve mendojnë se vaksinimi nuk është i nevojshëm sepse shumica e të rinjve e kalojnë COVID-19 pa simptoma serioze, rrallë përfundojnë në spitale dhe madje më rrallë vdesin. Nëse të gjithë anëtarët e rritur të familjes janë vaksinuar, duket se nuk ka asnjë arsye të fortë që ata të vaksinohen. Të rinjtë që përfundojnë në spital me COVID-19 janë pothuajse po aq të prirur ndaj komplikimeve sa edhe personat mbi 50 vjeç. Duhet të theksohet se vaksinimi i tyre është në të vërtetë më i rëndësishëm për t’i mbrojtur të moshuarit dhe në përgjithësi për ta ndaluar përhapjen e virusit.
Vaksinimi kundër COVID-19 është i sigurt, efektiv dhe shpëton jetë!
Shoqata Together for Life po realizon sesione informuese për të rritur ndërgjegjësimin ndaj vaksinimit për COVID-19, në kuadër të fushatës “Le të flasim për vaksinat”, mbështetur nga Organizata Botërore e Shëndetësisë në Shqipëri – WHO Albania.
Dr. Lumturi Merkuri ndau disa informacione të rëndësishme mbi vaksinat anti-COVID, si mjeti më efektiv për të mbrojtur veten dhe për t’i dhënë fund pandemisë. Ajo iu përgjigj edhe disa prej pyetjeve që i shqetësojnë më shumë të rinjtë kur flitet për vaksinimin kundër COVID-19.
