Blertina Koka / Shëndet+
Kastro Zizo ka shfryrë mllefin e tij ndaj mjekësisë shqiptare, që pa hezituar aspak, e konsideron fajtore për vdekjen e nënës së tij, e cila u nda nga jeta vetëm pak ditë më parë. I ftuar në emisionin “Zonë e Lirë”, kantautori shqiptar ka rrëfyer sagën e dhimbshme të vuajtjes dhe kurimit të nënës së tij dhe shumë të sëmurëve të tjerë në spitalet e Shqipërisë.
“Është kthyer në një reprezalje, në një grup kriminal mjekësia shqiptare. Sistemi është i kalbur, janë pallavra të gjitha këto që thonë. Si nëna ime ka shumë nëna të tjera në këtë vend që vuajnë,” shprehet Kastro.
Kastro fajëson shtetin shqiptar për vdekjen e nënës së tij dhe shumë të tjerëve në spitalin e Onkologjikut, pasi nuk arrin t’u sigurojë të sëmurëve ilaçet e duhura për kurim.
“Javën që nëna ime ishte e shtruar në QSUT, 9 të tjerë humbën jetën për shkak të kancerit sepse s’mundën të merrnin ilaçin që u duhej. Shishja e vogël e medikamentit dhe kura e kimioterapisë, që kushtojnë 2000 euro, mund t’ja kishin zgjatur jetën nënës time. Ka shumë njerëz që s’marrin dot as gjysmën e kurës sepse s’kanë para, apo që nuk ngrenë dot zërin sepse s’kanë frymë për ta bërë. Kjo mjekësi që është kthyer në një grup kriminal, po u merr jetën njerëzve”, bërtet Kastro, i cili nuk e fsheh dot më dhimbjen e madhe.
“Shteti i subvencionon, por shteti bën edhe dallime. Për disa ka, për të tjerë nuk ka. Shumica marrin një të katërtën e kurës, dhe jo vetëm që nuk i shëron, por i përkeqëson. Ka mijëra njerëz që e vuajnë dhe e vuajnë pafund këtë problem. Doktorët dhe shefat e tyre nga lart poshtë janë përgjegjës”, shprehet ai i indinjuar.
