Ashtu siç ishte parashikuar nga shërbimi meteorologjik, në ditët e para të korrikut, temperaturat kanë shënuar deri në 40 gradë Celsius. Përballë një situate të tillë, të parashikuar, kryetari i Bashkisë së Tiranës, Erion Veliaj, u ka bërë thirrje të gjithë qytetarëve që të mos abuzojnë me konsumimin e ujit të pijshëm, pasi do të ketë kufizime.
Kufizimet për ujin e pijshëm në një pjesë të vogël të qytetit janë vetëm një masë e përkohshme për shkak të motit të nxehtë dhe të thatësirës së zgjatur që ka përfshirë edhe vendet e tjera të Europës.
Ndërkohë nga ana e saj, Ministria e Shëndetësisë ka shpërndarë një sërë këshillash që mendohet të ndihmojnë qytetarët për të përballuar të nxehtin.
Por, sipas disa denoncimeve të mbërritura në redaksinë e Pro Pacientit, Ministria e Shëndetësisë nuk ka menduar për të përballuar furnizimin me ujë të spitaleve. Kështu, spitali i Elbasanit ka gjithë ditën pa ujë në të gjitha shërbimet. “Në spitalin e Elbasanit që prej mëngjesit jemi pa ujë. Na plasi vapa, e ujë nuk ka. Materniteti është pa ujë, kirurgjia pa ujë, shërbimi i sëmundjeve infektive gjithashtu është pa ujë”, shkruhet në denoncimin e mbërritur në redaksi. / ProPacientit
