Spitali Continental ka shpërndarë ndihma për familjet që humbën shtëpitë nga zjarri i rënë pak ditë më parë në Gramsh. Drejtuesit e këtij spitali kanë nisur drejt qytetit të Gramshit ndihma me ushqime, ilaçe dhe veshmbathje.
Të pranishëm ishin Kryetarja e Bashkisë Luljeta Dollani, përfaqësuesja e Këshillit Bashkiak, Greta Leno, anëtarë të shoqërisë civile e pushtetit lokal.
Spitali Continental u sensibilizua me thirrjet e vazhdueshme të shoqërisë civile për të ndihmuar këto familje të prekura nga fatkeqësia dhe që aktualisht janë pa një çati mbi kokë.
Zjarri i rënë pak ditë më parë në një pallat në Gramsh, shkrumboi banesat e 8 familjeve, duke i lënë këto të fundit në qiell të hapur.
Bashkia e Gramshit ka miratuar një fond prej 10 milionë lekësh të vjetra, për të paguar provizorisht qiranë e strehimit për këta banorë.
