Përshtati në shqip për “Shendeti.com.al“: Blertina Koka
Shumë kohë e shpenzuar tek iPad-i apo pajisje të ngjashme me prekje mund të pengojë në zhvillimin siç duhet të fëmijëve, paralajmërojnë ekspertët.
Studimi i kryer nga një grup shkencëtarësh nga Universiteti Curtin, në Australinë Perëndimore, është i pari që tregon ndikimin që luajnë pajisjet elektronike tek zhvillimi fizik i fëmijëve.
Në studim janë krahasuar fëmijë të moshës 3-4 vjeç që luajnë me lodra dhe ata që përdorin pajisje elektronike. Ata janë monitoruar përgjatë 5 viteve të para të jetës së tyre, për të parë ndikimin që luajnë pajisjet elektronike tek zhvillimi fizik, mendor dhe social i tyre.
Rezultatet treguan se fëmijët që përdornin pajisje elektronike lëviznin më pak se ata që përdornin lodra. Një gjë e tillë ndikon direkt tek zhvillimi i tyre fizik.
“Jemi të shqetësuar se përdorimi i tepërt i pajisjeve me ekran me prekje do të pengojë zhvillimin siç duhet të muskujve dhe kockave të fëmijëve për dy arsye: E para, sepse ata kalojnë më shumë kohë ulur se sa duke vrapuar ose luajtur, dhe humbasin stimulin që ndihmon për zhvillimin dhe forcimin e kockave dhe muskujve. E dyta, ata kalojnë shumë kohë me qafën ulur, prandaj janë më të prekur nga dhimbjet e qafës”, shpjegon prof. Leon Straker, autori kryesor i studimit.
Profesor Straker rekomandon që fëmijët të mos shpenzojnë më shumë se një orë në ditë tek të gjitha pajisjet elektronike.
Burimi: Daily Times / https://shendeti.com.al/
