Përshtati në shqip për gazetën “Shëndet+”: Blertina Koka
Meshkujt që përdorin viagra janë më pak të rrezikuar të vuajnë nga sulmet në zemër ose të vdesin nga një infarkt, ka zbuluar një studim i ri. Ky ilaç për impotencën tek meshkujt do të përdoret shumë shpejt për trajtimin e qindra mijëra pacientëve që kanë pësuar infarkt në zemër apo për të parandaluar sulmet më fatale në zemër, thonë shkencëtarët.
Ekspertët nga Universiteti i Mançesterit monitoruan 600 pacientë diabetikë të cilët kishin përdorur viagra për të trajtuar impotencën seksuale.
Ky ilaç qetëson qelizat muskulore në enët e gjakut që furnizojnë penisin, duke mundësuar rrjedhje më të shumtë të gjakut në këtë pjesë të trupit. Me rritjen e rrjedhjes së gjakut, rritet edhe mundësia për të pasur ereksion.
Ekspertët mendojnë se një përbërës kyç tek Viagra, i quajtur PDE5i, që qetëson enët e gjakut, parandalon gjithashtu dëmtimet në qelizat e zemrës. Infarkti në zemër shkaktohet kur zemra nuk arrin të pompojë mjaftueshëm gjak përreth trupit me presionin e duhur.
Edhe pse diabetikët janë më të rrezikuar nga problemet në zemër, pacientët që morën pjesë në studim nuk vuajtën aq sa pacientët që nuk e morën këtë medikament.
Profesori Andrew Trafford dhe ekipi i tij, i themeluar nga Fondacioni Britanik i Zemrës, po shpresojnë të tregojnë se ky medikament mund të ndihmojë gjithashtu në parandalimin e aritmisë kardiake.
Një studim i mëparshëm, i publikuar tek revista “BMC Medicine” tregoi se viagra mund të parandalojë rritjen e madhësisë dhe ndryshimin e formës së zemrës tek pacientët që vuanin nga hipertrofia e ventrikulit të majtë.
Burimi: Daily Mail / https://shendeti.com.al/
