Gjetjet e Rapotit “Ngacmimi Seksual në Vendin e Punës”, realizuar nga TFL me mbështetjen e Ambasadës së Vendeve të Ulta, vazhdojnë të tërheqin vëmendjen e medias dhe ekspertëve.
E ftuar në emisonin ‘OPEN’ të gazetares Eni Vasili, menaxherja e shoqatës ‘Together for Life’ dhe njëherësh drejtuesja e grupit të ekspertëve për realizimin e anketimit, Alma Lahe, bazuar në gjetjet e tij u shpreh se fenomeni i ngacmimit seksual në ambientet e punës ekziston dhe është evidentuar si më i përhapur në zonat e mëdha urbane si dhe ndërmarrjet e mëdha me më shumë se 100 punonjës.
“Fenomeni ekziston. Kemi pasur tre fokus grupe ku fenomeni është evidentuar edhe më i lartë, përveç Tiranës që ka fenomenin, por edhe ndjeshmërinë më të lartë. Ka qenë Korça, Lezha dhe Durrësi. Nga anketimi ka dalë se fenomeni është i hapur në zonat dhe ndërmarrjet e mëdha me më shumë se 100 punonjës. Diferenca mes privatit dhe sektorit publik ka diferencë shumë të ulët për ngacmimet seksuale”, shpjegoi ajo mes të tjerash.
