Denisa Canameti / Shendeti.com.al
Prezantimi i buxhetit 2017 në Shëndetësi në Komisionin Parlamentar të Ekonomisë është shoqëruar me debate nga Minsitri i Shëndetësisë, Ilir Beqaj dhe deputetë të opozitës. Demokratët hodhën akuza për dhënien me koncesion të 18 laboratorëve mjekësorë në spitalet e vendit, që është planifikuar gjatë vitit të ardhshëm, për koncesionet e dhëna më parë dhe për funksionimin e sistemit shëndetësor në tërësi.
Duke iu referuar koncesionit të Check up -it, opozita thotë se partneriteti publik – privat nuk ka funksionuar, shpenzimet rriten vetëm për koncesionet të cilat, sipas saj, i jepen njerëzve që s’kanë lidhje me shëndetësinë. Kjo është kundërshtuar nga Ministrit Beqaj, i cili thotë se buxheti 2017 është financimi më i madh publik i shëndetësisë në 25 vjet.
Jorida Tabaku: PPP për checkup pretendohej se do të ngriheshin 20 laboratorë të rinj, ndërkohë sot po jepen me koncesion. A nuk ishte detyrim i koncensionarit të parë të ngrenë këto laboratore?!
Ilir Beqaj: Në QSUT kemi probleme me realizimin e 3 analizave sepse volumi është i vogël dhe nuk e merr asnjë firmë përsipër që të na furnizojë.
Ilir Beqaj: Çështja e laboratorëve në kontrollin bazë është e ndarë nga laboratorët e spitaleve. Janë laboratorë të ngritur vetëm për kontrollin bazë, kryejnë 44 analiza. 25 laboratorë ka checkup-i.
Tabaku: Laboratorët e checkup-it nuk janë të rinj.
Ilir Beqaj: Laboratorët janë jashtë qendrave shëndetësore. Në qendra shëndetësore ka kabinete të checkup-it, nuk janë laboratorët. Janë 25 laboratorë në të gjithë Shqipërinë dhe shërbejnë për të kryer 44 analizat e checkup-it.
Jorida Tabaku: Nëse laboratorët kanë funksionuar, pse duhet t’i koncensionojmë. Po vendi i punës së laborantëve?
Ilir Beqaj: Për të pasur një kujdes shëndetësor adekuat janë shërbimi laboratorik dhe imazherik.
Dashamir Shehu: Nuk është problem qe jepni koncension, puna është se nuk ua jepni në administrim njerëzve që kanë kapacitet në shërbimin shëndetësor. Nëse urën e merr një firmë që prodhon domate, sigurisht që do lindin dyshime. Si bën dializën njëri që s’ka kapacitete shëndetësore. Largoni formulën e koncensioneve larg njerëzve qe s’kanë lidhje me shëndetësinë.
