Instituti i Shëndetit Publik konfirmon pragun e epidemisë e gripi dhe situatën e renduar epidemiologjike në vend.Tanimë numri i të infektuarve në jave arrin 19 mijë persona.
Virusi i gripi A dhe B bashkë me nëntipet janë në sezonin e tyre por paralelisht në vend janë duke qarkulluar virusi respirator sinsicail dhe viroza të tjera.
Mjekët pediatër po përballen me fluks të lartë vizitash në javën e fundit. Problematikat shëndetësore tek të vegjlit janë disa, por predominojnë virozat, dhe gripi që ka nisur qarkullimin sezonal. Temperatura sipas mjekëve është ajo që po i mundon më shumë të vegjlit.
Mjekët pediatër, thonë se qarkullimi i shumë viruseve dhe mbivendosja e tyre po e vështirëson më shumë situatën shëndetësore tek disa fëmijë. Mes pacientëve të vegjël nuk mungojnë as rastet e bronkopneumonive dhe pneumonive, që kërkojnë trajtim të zgjatur , ndonjëherë edhe shtrim në spital.
Sipas familjarëve tek Urgjenca Pediatrike janë vetëm 2 mjekë dhe 2 infermierë, të cilët nuk përballojnë fluksin dhe radha ka shkuar shumë e gjatë, ndaj bëjnë thirrje për shtim të mjekëve për të shmangur pritjet e gjata me fëmijët në krah.
Situata e rënduar pohohet edhe nga vetë mjekët, të cilët deklarojnë se numri i vizitave për një mjek në poliklinikë, ndonjëherë kalon mbi 50.
