Nëse vendosni të pini çaj në drekë, darkë ose me disa snacks të caktuar, duhet të jeni i vetëdijshëm për rreziqet e vogla të shëndetit që mund t’ju paraqiten.
Sipas farmacistes dhe terapistes së ushqimit Deborah Grayson, pirja e çajit ose kafesë së bashku me ushqime të caktuara, si mishi i kuq dhe perimet me gjethe jeshile, mund të rrisë mundësinë për të zhvilluar deficite të rëndësishme të lëndëve ushqyese. Saktësisht, kimikatet në këto pije të nxehta janë të njohura për faktin se ndalojnë trupin të absorbojë hekurin — një mineral thelbësor për transportimin e oksigjenit nëpër trup, për t’ju dhënë energji dhe për të mbajtur një sistem imunitar të fuqishëm.
“Nëse pini gjithmonë çaj me ushqimin tuaj, mund të bëheni anemikë,” i tha Grayson gazetës The Mirror.
Ajo shpjegoi se rreziku i anemisë — një mungesë e rëndë e hekurit — është veçanërisht i lartë për gratë që kanë periudha të gjata menstruale.
Ushqimet që nuk duhet të konsumohen me çaj dhe kafe janë ato të pasura me hekur, si bifteku, mishi i pjekur, dhe perimet me gjethe jeshile si spinaqi, brokoli dhe kale.
Studimet kanë treguar se disa kimikate në çaj dhe kafe mund të pengojnë thithjen e hekurit, përfshirë polifenolet, të cilët ndihmojnë në mbrojtjen nga inflamacioni.
Polifenolet ndodhen gjithashtu në ushqime si fruta, perime dhe erëza, por në nivele shumë më të ulëta.
Taninet, të cilat ndodhen gjithashtu në verë, si dhe oksalatet, janë gjithashtu të njohura për efektin e tyre në bllokimin e thithjes së hekurit.
Simptomat e anemisë mund të jenë shumë të rënda dhe përfshijnë lodhje ekstreme, humbje të flokëve dhe infeksione të përsëritura.
Zonja Grayson ka dhënë këshilla edhe për disa gabime të tjera gjatë ushqimit, që mund të dëmtojnë shëndetin tonë.
Për shembull, ajo sugjeron që ata që kanë pak oreks dhe duan të fitojnë peshë ose muskuj të shmangin pirjen e tepërt të lëngjeve gjatë vakteve.
“Prania e lëngjeve në stomak mund të zvogëlojë sasinë e ushqimit që mund të konsumoni,” thotë ajo.
“Pra, nëse keni pak oreks, pirja e disa gllënjkave uji, nëse është e nevojshme, mund të ndihmojë që të hani një sasi më normale ushqimi.”
Ndryshimi i llojit të sallatës që konsumoni mund të ndihmojë në lehtësimin e simptomave të tretjes pas vakteve.
Zonja Grayson sugjeron se rukola dhe cikoria, “stimulojnë procesin e tretjes dhe ndihmojnë trupin të përgatitet për të tretur plotësisht ushqimin që hamë”.
Këshilla të tjera përfshijnë të ngrënit jo më vonë se tre orë para se të shkoni në shtrat dhe shmangien e shtrirjes pas një vakti për të evituar simptomat e refluksit.
Për më tepër, të ulesh në një tavolinë, në vend të një divani, e ndihmon sistemin e tretjes të shpërbëjë ushqimin më mirë dhe zvogëlon rrezikun e problemeve, thotë Grayson.
