Një shpërthim i ri misterioz i virusit ka mbuluar spitalet në Kinë dhe qytetarët po vendosin maska përsëri në fytyrat e tyre. Videot në mediat sociale tregojnë njësi të mbipopulluara me staf mjekësor, që luftojnë për të përballuar fluksin e pacientëve.
Prindërit shikohen teksa mbajnë fëmijë të sëmurë në radhë të gjata deri në orët e vona të natës për të marrë kujdesin pediatrik. Shumë “shikojnë” ngjashmëri me ditët e para të errëta të pandemisë Covid pesë vjet më parë në qytetin e Wuhan.
Sipas raporteve të mediave lokale, shkaku i gjendjes është një virus pak i njohur i quajtur metapneumovirus (HMPV), ai zakonisht shkakton një sëmundje të lehtë, të ngjashme me të ftohtin, me ethe, kollë, rrjedhje hundësh dhe frymëmarrje. Në raste të rënda, HMPV mund të çojë në bronkit ose pneumoni, veçanërisht te fëmijët.
Virusi përhapet përmes pikave të frymëmarrjes dhe kontaktit të ngushtë fizik, duke e bërë atë shumë ngjitës në mjedise të mbushura me njerëz.
Organizata Botërore e Shëndetësisë theksoi rritjen e rasteve në një buletin të nëntorit, duke vënë në dukje se infeksionet e frymëmarrjes janë rritur që nga tetori.
Por a jemi të rrezikuar nga ky virus? Instituti i Shëndetit Publik deklaron se rreziku i shfaqjes së virusit në vendin tonë është i ulët.
Virusi i shfaqur në Kinë kohët e fundit nuk rrezikon vendin tonë dhe as Europën. Rreziku i shfaqjes së është fare i ulët. Ndërkohë ISHP jep edhe disa rekomandime standarde për të zvogëluar ekspozimin ndaj kësaj sëmundje:
1) Lani duart me ujë dhe sapun, ose përdorni solucion të duarve me alkool.
2) Kur kolliteni dhe teshtini mbuloni hundën dhe gojën me shami ose me parakrah.
3) Shmangni kontaktet e afërta me çdo njeri që ka simptoma të rrufës/gripit.
4) Praktikoni rregullat bazë të higjenës gjatë gatimit.
5) Shmangni kontaktin me kafshë të gjalla.
