Drejtoria e AKU-së në Vlorë, sekuestroi të martën 2.7 kuintal peshk që tregtohej jashtë kushteve higjieno-sanitare. Inspektorët e Drejtorisë Rajonale të AKU-t konstatuan tregtimin e një sasie peshku në disa pika në trotuare dhe makina, pa respektuar asnjë kusht higjieno-sanitar, që garanton sigurinë ushqimore.
U sekuestrua sasia e peshkut, ndërsa ndaj personave që e tregtonin nuk u morën masa konkrete, pasi ishin të palicencuar dhe si pasojë, nuk mund të merreshin masa ndaj tyre, përveç sekuestrimit të produktit.
Drejtori i AKU-t në Vlorë, Renato Banushaj, tha për mediat lokale se asnjë rast abuzimi nuk do të tolerohet, ndërsa u bëri thirrje qytetarëve që të shmangin blerjet në ambientet e pakontrolluara dhe që nuk plotësojnë kushtet higjieno-sanitare, por t’u drejtohen marketeve dhe ambienteve të kontrolluara.
Autoriteti Kombëtar i Ushqimit, duke iu bërë thirrje konsumatorëve që të jenë të kujdesshëm në blerjet që bëjnë, i njofton se për çdo rast abuzimi apo problemi me ushqimet, në dispozicion të tyre është numri jeshil 0800 75 75, 24 orë, si dhe adresa e emailit info@aku.gov.al.
