Në 6 muaj si ministre e Shëndetësisë dhe Mbrojtjes Sociale, Ogerta Manastirliu pranon se me gjithë punën që bërë në 4 vjet nga qeveria Rama, ende ka shumë për t’u bërë për fushën e shëndetësisë, një sektor ky i ndjeshëm dhe e vështirë.
E ftuar në studion e lajmeve në Ora News, përballë moderatores Ilva Tare, ministrja u shpreh se këto 6 muaj, çdo ditë e ka kaluar me merakun për qytetarët nëse po marrin shërbimin e duhur.
“Unë nuk fle. Kam 6 muaj që praktikisht janë gjithë kohës jam bashkë me stafin tim…
“Kjo nuk është e shëndetshme as për ju, as për sistemin”, i përgjigjet moderatorja.
“Kur them nuk fle, nuk do të thotë që nuk bëj orët e gjumit, por nuk fle në kuptimin e merakut dhe përgjigjes që ne i japim qytetarëve për çdo shqetësim që ata kanë. Patjetër është ekipi ai që prodhon suksesin. Ekipi i shëndetësisë po konsolidohet në një reformim të vazhdueshëm të institucioneve tona, qoftë të urgjencës, qoftë në periferi”, sqaron ministrja.
“Me gjithë punën e madhe që kemi bërë në fushën e shëndetësisë, ende kemi për të bërë për shëndetësinë. Jemi duke punuar fort çdo ditë, me hapa të vegjël, të sigurt për të ndërtuar një sistem shëndetësor. E gjetëm si një ngrehinë, si një trup të vdekur që ne e sollëm në jetë dhe tani po përpiqemi ta ngremë në këmbë. Nuk është e lehtë, është shumë e vështirë, kërkon shumë impenjim”, shprehet ajo.
