Përshtati në shqip: Arlinda Rexhmati
Endometrioza është një çregullim ku inde të ngjashme me indet që normalisht veshin muret e brendshme të mitrës (endometriumit), rriten jashtë mitrës.
Simptomat e endometriozës janë të ngjashme me ato të problemeve të tjera shëndetësore, duke e bërë kështu të vështirë diagnostikimin. Për këtë arsye, shumë gra, përjetojnë simptoma të endometriozës deri në 10 vjet para se të marrin një diagnozë dhe trajtimin e duhur.
Një diagnozë e hershme e endometriozës mund të ndihmojë në një menaxhim më të mirë të simptomave. Prandaj është e rëndësishme që t’i dini shenjat dhe simptomat e saj e të diskutoni me mjekun tuaj nëse mendoni se mund të vuani nga diçka e tillë.
Shenjat dhe simptomat e endometriozës:
- Menstruacione të dhimbshme (dysmenorrhea)
Dhumbjet dhe krampet mund të fillojnë para menstruacioneve dhe të vazhdojnë gjatë dhe disa ditë pas tyre. Disa gra e përshkruajnë këtë dhimbje si shumë më të madhe se zakonisht dhe me intensitet që rritet me kalimin e kohës.
- Dhimbje në zonën e pelvisit, belit dhe fundit të shpinës
Mund të përjetoni dhimbje në këto zona gjatë menstruacioneve ose ndonjëherë dhimbjet mund të jenë kronike.
- Dhimbje gjatë apo pas kryerjes së marrëdhënieve seksuale
Kjo dhimbje mund të duket e thellë dhe ndryshon shpesh, me ndryshimin e pozicioneve apo fazës së menstruacioneve.
- Gjakrrjedhje e tepërt
Mund të përjetoni gjakrrjedhje të tepërt gjatë periodave (menorrhagia ) apo midis periodave me njëra – tjetrën (menometrorrhagia).
- Vështirësi për të ngelur shtatzënë (infertilitet)
Në shumë raste endometrioza diagnostikohet në gra që kërkojnë trajtim për infertilitet.
- Dhimbje gjatë jashtëqitjes apo urinimit
Zakonisht kjo simptomë ndodh gjatë menstruacioneve.
- Lodhje dhe simptoma digjestive
Simptoma të tjera mund të jenë lodhja, diarreja, kapsllëku, fryrja apo të vjella, sidomos gjatë menstruacioneve.
Burimi: Mayo Clinic
