9 HEC-e të tjera do të ndërtohen mbi lumin Langaricë nga kompania “Rajan Energy”. Langarica tashmë ka 2 HEC-e, njëra prej të cilave ka ngjallur shumë kundërshtime nga komuniteti lokal dhe shoqatat mjedisore, 
sepse është ndërtuar në monument natyror dhe park kombëtar. 9 HEC-et janë: HEC-Dedovë, HEC-Sotire, HEC-Mesare, HEC-Gradishtë, HEC-Osnat, HEC-Peshtan, HEC-Pode, HEC-Radon, HEC-Rajan 2. 6 HEC-et e fundit bien në zonën e mbrojtur të burimeve të menaxhuara Piskal-Shqerri, ku zbatohet shkalla e katërt e mbrojtjes. Piskal-Shqerri është zonë shumë e bukur turistike, me ujvara e përrenj të vizituar dhe nga turistë të huaj.
Këto zona janë shpallur të mbrojtura për të ruajtur florën dhe faunën e tyre nga ndërhyrja njerëzore. Pothuaj gjithë HEC-et e vogla marrin mbi 80% të ujit të përrenjve dhe i fusin në tuba, duke pakësuar rrjedhjen e lirë të përrenjve. HEC-et janë të detyruara të lënë rrjedhje ekologjike në shtratin natyral të përrenjve, por kjo shpesh nuk zbatohet dhe nuk monitorohet. Ndërtimi i këtyre HEC-eve do të ketë ndikim negativ në potencialin turistik të zonës, ndërsa rrezikon edhe llixhat e Bënjës.
