Një mollë në ditë mund ta mbajë mjekun larg, por a është ky fiksimi ynë, duke lënë në hije frutat e tjera? Ne priremi të zgjedhim kekun me mollë, më shumë se kekun me dardhë, por ka disa përfitime të mahnitshme shëndetësore nga dardhat të cilat duhet t’i dini.
Dardha është e shijshme, me pak kalori dhe është e mbushur plot me lëndë ushqyese:
- Kalori: 101
- Yndyrë: 0 g
- Karbohidratet: 27 g
- Fibra: 6 g
- Sheqeri: 17 g
- Sheqeri i shtuar: 0 g
- Proteina: 1 g
- Magnez: 12.5 mg
- Kalium: 206 mg
- Vitamina C: 8 mg
Dardha jep një sasi të madhe fibrash, që ju ndihmojnë të jeni të ngopur dhe ndihmojnë për shëndetin e zorrëve dhe të zemrës. Dardhat janë gjithashtu relativisht të ulëta në kalori dhe nuk kanë sheqer të shtuar.
Dardhat janë të mira për tretjen tuaj
Me 6 g fibra, dardhat kanë më shumë fibra, sesa një porcion me lakër jeshile. Nga ndihma për të mbajtur një peshë të shëndetshme deri te zvogëlimi i rrezikut të zhvillimit të diabetit të tipit 2, ngrënia e mjaftueshme e fibrave është pjesë përbërëse e një diete të ekuilibruar mirë.
Dardha ka një indeks të ulët glicemik
Edhe pse dardhat kanë pak sheqer natyral, përmbajtja e tyre e lartë në fibra dhe antioksidantë sigurojnë që sheqeri në gjak të mos rritet pasi t’i keni ngrënë. Plus, indeksi i ulët glicemik i dardhës do të thotë që nuk do të jeni të uritur disa minuta pasi të keni ngrënë një të tillë.
Dardhat janë të mira për zemrën tuaj
Fibrat luajnë një rol në uljen e presionit të gjakut dhe kolesterolit, gjë që ul rrezikun e zhvillimit të sëmundjeve të zemrës. Dardhat janë të pasura me fibra dhe kalium, që ndihmon në luftimin e natriumit të tepërt, dhe janë një zgjedhje e mirë për t’u përfshirë në një dietë të shëndetshme për zemrën.
Dardhat luftojnë radikalet e lira
Vitamina C në dardha lufton radikalet e lira. Ky është një lajm i mrekullueshëm, pasi radikalet e lira mund t’i vënë qelizat tuaja nën stres oksidativ dhe të çojnë në sëmundje kronike. Kjo do të thotë se ngrënia e dardhave – dhe ushqimeve të tjera të pasura me antioksidantë – mund të zvogëlojë rrezikun e zhvillimit të kancerit, diabetit, sëmundjeve të zemrës dhe madje edhe sëmundjeve neurodegjenerative.
Në fund të fundit
Dardha është e mirë për tretjen, zemrën dhe nivelin e glukozës në gjak. Hani dardha të papërpunuara ose provoni të gatuani me to receta të ndryshme.
