Gjashtë persona kanë humbur jetën si pasojë e një shpërthimi të sëmundjes së Legjionarëve (Legionnaires’ disease) në zonën Upper East Side të New York-ut, ndërsa autoritetet shëndetësore kanë konfirmuar gjithsej 90 raste të infektimit.
Sipas Departamentit të Shëndetësisë së qytetit, nuk janë regjistruar raste të reja që nga 17 korriku. Aktualisht, gjashtë pacientë vazhdojnë të marrin trajtim në spital, ndërsa 65 të tjerë janë shëruar dhe janë liruar.
Hetimet zbuluan praninë e bakterit Legionella në dhjetëra kulla ftohëse të ndërtesave. Autoritetet njoftuan se të gjitha objektet e prekura janë pastruar dhe dezinfektuar, duke shtuar se burimi i shpërthimit është eliminuar.
Sëmundja e Legjionarëve është një formë e rëndë e pneumonisë që shkaktohet nga thithja e pikëzave të ujit të kontaminuara me bakterin Legionella. Ajo nuk transmetohet zakonisht nga personi te personi, por përhapet përmes sistemeve të kontaminuara të ujit, si kullat ftohëse, depozitat e ujit të ngrohtë, dushët dhe instalimet hidraulike.
Shumica e pacientëve shërohen me antibiotikë, por personat me sistem imunitar të dobësuar, të moshuarit dhe ata me sëmundje kronike të mushkërive janë më të rrezikuar nga komplikacione të rënda që mund të rezultojnë fatale.
