Muaji janar shënoi një rritje të ndjeshme të rasteve të gripit, i cili ka prekur me mijëra persona në të gjithë vendin.Kjo ka bërë që shumë qytetarë në Gjirokastër të kërkojnë medikamente pa rekomandimin e mjekut, një veprim që kundërshtohet nga Urdhëri i Farmacistëve.
Ata theksojnë se marrja e barnave pa konsultë mund të shkaktojë komplikacione serioze për shëndetin e popullatës ndërsa Urdhëri i Farmacistëve në këtë qytet apelon që përdorimi i antibiotikëve në këto raste duhet të jetë i kontrolluar dhe vetëm pas konsultimit me mjekun.
“Për periudhën e gripit, përdorimi i antibiotikëve është një çështje shumë e rëndësishme, sepse përdorimi i tepruar mund të çojë në rezistencë ndaj tyre. Antibiotikët nuk duhet të përdoren në gjendje virale, dhe për këtë arsye është e domosdoshme që pacientët të drejtohen tek mjekët kur simptomat janë më të theksuara”, thotë Albana Braja, Kryetare e Urdhrit të Farmacistëve në Gjirokastër.
“Ne gjithmonë i kemi drejtuar pacientët tek mjekët kur kërkojnë antibiotikë. Asnjëherë nuk jemi përgjigjur kërkesave për barna pa recetë, pasi është e rrezikshme për shëndetin e tyre”, thotë Albana Braja, Kryetare e Urdhrit të Farmacistëve në Gjirokastër.
Në Gjirokastër, çdo ditë rreth 250 persona kërkojnë ndihmë mjekësore për gripin në spital dhe qendrat shëndetësore, duke treguar përhapjen e gjerë të këtij virusi.
