Shumë njerëz preferojnë të eksperimentojnë më ngjyrat e flokëve duke i lyer shpesh, por si ndikon kjo në shëndetin e tyre? Dhe pikëpyetja më e madhe; a mund të ndikojë në shanset për t’u prekur nga kanceri?
Disa studime tregojnë një lidhje midis kimikateve në disa ngjyra flokësh dhe kancerit. Por ato nuk vërtetojnë se ngjyra e flokëve ishte përgjegjëse. Rreziku është ndoshta i ulët tek njerëzit që i lyejnë flokët herë pas here. Nëse ekziston një rrezik, ai është ndoshta më i lartë për njerëzit që punojnë me bojë gjatë gjithë ditës, për ngjyrat më të errëta dhe për ngjyrat që zgjasin më shumë.
Ngjyrat e flokëve të prodhuara para vitit 1980 përmbanin disa kimikate që lidheshin me kancerin. Që atëherë, kompanitë kanë ndryshuar kimikatet që përdorin për të bërë bojërat e tyre. Megjithatë, mund të ketë ende disa përbërës në ngjyra që mund të jenë të rrezikshëm.
Kimikatet në ngjyrat e flokëve
Pjesa më e madhe e rrezikut të kancerit lidhet me bojërat që ngjyrosin flokët përgjithmonë, jo ato që lahen pas një ose dy larjesh flokësh.
Ekzistojnë shumë lloje të ndryshme të bojërave të flokëve, dhe ato përmbajnë mijëra kimikate të ndryshme. Amoniaku, aminat aromatike dhe peroksidi i hidrogjenit janë vetëm disa nga kimikatet që ndihmojnë ngjyrën të depërtojë në boshtin e flokëve dhe të ndryshojë ngjyrën e tyre.
Kur lyeni flokët, ju thithni sasi të vogla të këtyre kimikateve përmes lëkurës së kokës ose i thithni ato me frymë. Njerëzit që punojnë me ngjyrues flokësh në sallone bukurie dhe berberhane ekspozohen më shumë ndaj kimikateve në ngjyrat e flokëve sesa njerëzit që i lyejnë flokët.
Disa nga kimikatet në ngjyrat e flokëve ndryshojnë nivelet dhe veprimet e hormoneve si estrogjeni në trup. Hormonet mund të ndihmojnë në rritjen dhe përhapjen e disa kancereve, duke përfshirë disa kancere të gjirit.
