Problemet me gjumin janë një nga shqetësimet më të mëdha. Stresi, ankthi, pagjumësia kronike, shkaqet janë të shumta. Edhe pse melatonina mbetet një zgjidhje popullore në këto raste, mjekët në përgjithësi rekomandojnë konsumimin e superushqimeve që mund të përmirësojnë gjumin. Ja pesë ushqime që mund t’i konsumoni rregullisht për një gjumë më të mirë.
Kivi
Edhe pse kivi zakonisht konsiderohet si një frut ideal për mëngjes, në fakt është i përshtatshëm për t’u konsumuar disa orë para gjumit. I pasur me serotoninë dhe antioksidantë, ju ndihmon të flini më shpejt dhe gjithashtu përmirëson cilësinë e gjumit tuaj.
Bajame
Nëse jeni duke kërkuar një superushqim të lehtë për ta ngrënë para gjumit, bajamet janë perfekte. Të pasura me magnez, ato ndihmojnë në uljen e stresit dhe sigurojnë natyrshëm melatoninë, molekulën që nxit gjumin. Bajamet luftojnë si lodhjen ashtu edhe nervozizmin.
Salmoni
Dihet që ushqimet e pasura me omega-3 janë ideale për konsum gjatë natës, pasi ato ndihmojnë në rregullimin e niveleve të serotoninës në trup, molekula që rregullon humorin dhe ciklin gjumë-zgjim.
Qumësht
Për ata që nuk janë intolerantë ndaj laktozës, një gotë e vogël qumështi para gjumit është ideale. I ngrohur pak, nxit prodhimin e melatoninës falë përmbajtjes së lartë të triptofanit (një pararendës i serotoninës).
Banane
Duke qenë se përmbajnë magnez dhe kalium, bananet ju ndihmojnë të relaksoheni para gjumit. Hajini ato rreth një orë para se të flini.
