Çështja e testimit ka nxjerrë në pah edhe një sërë mangësish të tjera që lidhen si me sistemin shëndetësor, ashtu edhe me sistemin arsimor. Jo vetëm në rastin e këtij testimi por edhe në konkursin e specializimeve, studentët janë të njohur paraprakisht me pyetjet. Kjo bën që faktori kohë të bëhet më i rëndësishëm se faktori dije.
Mjeku hematolog Sotiraq Lako e konsideron të papranueshme dhe paradoksale faktin që pyetjet jepen përpara se të hysh në provim. Ku mbetet vlera e testimit në fund të fundit?!
“Në konkursin (nëse mund të quhet i tillë) të Specializimeve për Mjekët, të gjithë i kishin tezat e gatshme, së bashku me përgjigjet. Detyra ishte vetëm të mbaje mend përgjigjen (që nuk është aspak problem për një mjek) ose ta fotografojë.
“Në këtë pseudo-testim, tezat jepen përsëri të gatshme 2 javë para ditës së pretenduar, në mos më herët. Ato që kanë vlerë shkencore, janë plotësuar, budallallëqet po përpiqemi t’i gjejmë një përgjigje kolektive, të përshtatshme me realitetin tonë dhe mendjen e shkencëtarëve që na kanë ardhur të specializuara nga Amerika dhe Franca”, thotë Lako.
Më tej, mjeku vazhdon se detyra e infermierëve në këtë testim “është të mësojnë përgjigjet e gatshme, por meqenëse i kanë mësuar në orarin e punës dhe mund të bëjnë ndonjë gabim, le t’i fotografojnë me celularët e tyre. Plotësimi nuk besoj se është ndonjë problem”.
Duke ironizuar një testim të tillë që nuk ka asnjë vlerë për bluzat e bardha dhe nuk teston në fakt asgjë, përveçse aftësisë së tyre për të mbajtur mend, mjeku hematolog shkruan:
“Ndoshta deri në datën e pretenduar del një urdhër i ri: “Plotësojini në shtëpi dhe ju lutem na i sillni në orarin e përcaktuar”.
