Statusi i Universitetit të Mjekësisë ka kaluar sërish në qendër të vëmendjes. Sot studentët i janë drejtuar me një peticion Kryeministrit të Shqipërisë, Edi Rama për rishikimin e statusit të këtij Universiteti, të krijuar në vitin 2013. Ky peticion është firmosur nga mbi 2200 studentë.
Universiteti i Mjekësisë së Tiranës u krijua në janar 2013 si një shkëputje artificiale, e forcuar dhe aspak e justifikuar nga Universiteti i Tiranës. Grupi i punës i ngritur në atë kohë nga Universiteti i Tiranës, pas një studimi të hollësishëm u shpreh në mënyrë të qartë dhe hapur kundër kësaj ndarjeje aspak të bazuar në parimet akademike, autonomine universitare, modelet europiane, Kartës së Bolonjës, reformatimin e kurrikulave, marrëveshjes së Sorbonës etj. Pavarësisht këtij raporti, vendimi për “krijimin e këtij institucioni” rishtazi, rezultoi i pakthyeshëm dhe pasojat aspak të menduara.
