Një pjesë e pacientëve të cilët qëndrojnë të shtruar për të marrë kujdesin shëndetësor pranë Qendrës Spitalore Universitare “Nënë Tereza” në Tiranë, kanë lënë sot ambientet spitalore për t’u bashkuar familjeve natën e ndërrimit të viteve. Burime nga spitali bëjnë me dije se janë marrë të gjitha masat e nevojshme që pacientët të cilët nuk janë në gjendje të rëndë shëndetësore, të mund të kalojnë pranë familjeve të tyre, natën e ndërrimit të viteve, duke marrë me vete dhe mjekimet përkatëse.
Sipas këtyre burimeve, pacientët do të rikthehen sërish në fillim të janarit për të ndjekur vazhdimin e kurës së tyre. Ndërsa për pacientët për të cilët situata shëndetësore është paksa e komplikuar dhe nuk e favorizon largimin, do të qëndrojnë të shtruar në QSUT nën kujdesin 24 orë të mjekëve të spitalit./ Aishe Thartori
