Përshëndetje. Jam 56 vjeç dhe kam dëgjuar për një sëmundje “zjarri i natës”. Ju lutem çfarë është dhe çfarë simptomash ka. Faleminderit nëse përgjigjeni!
Përgjigjet mjekja infeksioniste Entela Kolovani
Herpes zoster apo zjarri i natës siç njihet nga njerëzit, është një sëmundje infektive e shkaktuar nga i njëjti virus që shkakton edhe variçelën apo linë e dhenve, i cili bën pjesë në familjen e Herpesviridaeve. Familje në të cilën bëjnë pjesë edhe viruse të tjerë herpetikë, shkaktarë të sëmundjeve të tilla si herpes labial apo genital, mononukleoza infektive, CMV etj.
Shenjat e para të simptomave të zosterit janë djegia apo dhimbja bezdisëse dhe ndonjëherë mpirja e lëkurës, në zonën e prekur. Pacienti mund të ketë ethe, dhimbje koke apo edhe të përziera.
Dhimbja e HZ mund të jetë mesatare deri në intense, shpesh njerëzit e përshkruajnë si mjaft rebele. Pacientët me zoster të trungut mund ta ndiejnë në formë spazmash edhe në prekjen apo ngacmimin më të lehtë.
