Denisa Canameti
Mungesa e medikamenteve në urgjencën e Durrësit është bërë shkak për një përplasje fizike mjek-pacient. Adriatik Hoxha, ish punonjës i policisë së shtetit, i cili kishte dërguar në urgjencë babain e tij ka dhunuar mjekun me inicialet A.N. Sipas të dhënave të bëra të ditura nga policia, sherri ka ndodhur për shkak se kirurgu i ka kërkuar pacientit që t’i blinte vetë ilaçet jashtë spitalit. Pas ngjarjes, mësohet se mjeku ka pësuar fraktura të rënda në njërën dorë
Evidentimi i personit që dhunoi mjekun është bërë i ditur nga kamerat e sigurisë së institucionit, të cilat janë sekuestruar nga policia në cilësinë e provës materiale.
Për rastin në fjalë, Ministria e Shëndetësisë ka reaguar në një njoftim për media, ku shprehet se dënon aktin e shëmtuar të dhunës ndaj mjekut.
“Dhuna e ushtruar ndaj bluzave të bardha në krye të detyrës është një akt i shëmtuar, prandaj Ministria e Shendetësisë është e vendosur të inkurajojë organet kompetente që të vendosin drejtësi. Ministria përmes deklaratës së saj i bën thirrje qytetarëve “të respektojnë figurën e mjekut dhe personelit në detyrë dhe të denoncojnë çdo rast abuziv” .
