Bilbil Hoxha, mjeku urolog pranë QSUT-së
Kanceri i prostatës është një sëmundje e cila kohët e fundit është shtuar me ritme të shpejta në vendin tonë. Por, pavarësisht këtij fakti shqetësues, informimi mbi mundësitë e parandalimit të kësaj sëmundje tek meshkujt shqiptarë është ende në nivele të ulëta, çka po ndikon në shtimin e pacientëve që identifikohen të prekur nga kanceri i prostatës.
Sot flitet shumë për shkaktarët e kancerit të prostatës, akuzohen kimikate të ndryshme, akuzohen nivele hormonale të testosteronit, por asgjë nuk është e vërtetuar. Ndaj sot futet në kuadrin e atyre sëmundjeve me origjinë multifaktoriale.
Simptomat
Shumica e tumoreve në prostatë shkaktojnë vetëm shqetësime të vogla ose nuk shkaktojnë shqetësime për një kohë të gjatë. Për këtë shkak kanceri i prostatës shpesh zbulohet në kuadër të ndonjë ekzaminimi rutinë, atëherë kur personi i prekur akoma nuk ndjen shqetësime. Në rast se tumori është aq i madh, saqë e ka ngushtuar uretrën (ujëhollënxjerrësin), mund të paraqiten probleme gjatë urinimit, për shembull:
- Rrjedhë e dobët e urinës
- Presion i shpeshtë për urinim
- Dhimbje ose vështirësi të tjera gjatë urinimit
- Gjak në urinë
Gjithsesi, shqetësime të tilla paraqiten shpesh tek burrat e moshuar edhe pa praninë e kancerit në prostatë. Në shumicën e rasteve ato shkaktohen nga ndonjë zmadhim i prostatës.
