Doja të denoncoja një rast që më ndodhi sot në Qendrën Spitalore Universitare “Nënë Tereza”. Im atë kishte marrë të gjitha dokumentet që i duheshin nga mjeku i lagjes, si dhe rekomandimet dhe erdhi të bëjë një konsultë në spital. Mjeku përgjegjës, pasi lexoi letrat, i kërkoi të bëjë edhe një EKO për siguri dhe më pas t’i jepte përgjigjen e duhur lidhur me problemin që kishte. Në mbërritjen tek vendi ku bëhej EKO-ja (gjithnjë në spitalin “Nënë Tereza”), fjala e parë e personit me bluzë të bardhë ishte se EKO-ja bëhej me pagesë, pavarësisht faktit se ishte me rekomandim nga mjeku dhe se personi që do merrte shërbimin, ishte pensionist. Në derë shkruhej: EKO me film – 1500L / Eko pa film 1000L. Duke qenë se mjeku e kishte kërkuar me film EKO-n, shkuam te sporteli për të paguar 1500L që ishte fatura. Por, “bluza e bardhë” u afrua dhe i tha sportelistes: “Shkruaje pa film, se nuk ka filma shteti”. Pyetjes nëse tim eti shërbimi do t’i ofrohej siç duhej, i erdhi përgjigjja “sigurisht”.
Ndërsa prisja pas dere shoh tim atë që del ende pa mbaruar mirë. I duhej të urinonte, sepse kështu i ishte kërkuar nga specialisti përkatës, me shprehjen: “Ik bëje në ndonjë cep aty përpara, se s’ka banjë!” Dhe im atë nuk kishte ku të shkonte e gjithë siklet iu drejtua cepit të spitalit, me kurriz nga rruga. Kur mbaroi së bëri EKO-n më tha se 500-lekëshin e “filmit” ia kishte dhënë në dorë specialistit, shteti i të cilit nuk kishte as film dhe as banjë.
