Shoqata “Together for Life”, me mbështetjen e Agjencive të Kombeve të Bashkuara në Shqipëri, në kuadër të fushatës ndërkombëtare “16 ditë aktivizëm kundër dhunës gjinore” organizon ditën e mërkurë, 25 nëntor 2015, pranë maternitetit “Mbretëresha Geraldinë” aktivitetin me temë: “Ai dhe Ajo krijojnë jetën. Bëje botën portokalli”.
Të rinj, aktivistë të shoqërisë civile, mjekë dhe infermierë të stafit mjekësor të maternitetit, personalitete shoqërore dhe artistike do të bëhen bashkë për të dëshmuar dhe dhënë mesazhe kundër çdo forme të dhunës gjinore, si dhe mesazhe për rëndësinë e barazisë prindërore në krijimin e një familjeje të shëndoshë.
Jeni i/e ftuar të na bashkoheni në këtë nismë të rëndësishme për dhënien fund diskriminimit gjinor dhe promovimin e rolit të patjetërsueshëm të gruas në shoqëri.
Aktiviteti do të zhvillohet në hollin kryesor të maternitetit “Mbretëresha Geraldinë”, ora 11:00 – 12:00.
Pjesëmarrësit janë të inkurajuar të veshin diçka portokalli, qoftë kjo veshje apo aksesor.
