Denisa Canameti, gazeta “Shëndet+”
Në onkologjik asgjë nuk është e bukur përtej fasadës. Pacientë që ecin në fijen e hollë që ndan jetën nga vdekja. Një përpjekje për të mbijetuar midis përgjigjeve: “Nuk mund të të ofrojmë asgjë”. Ilaçe që blihen jashtë apo kimio që bëhen në karrige. Kjo është panorama e trishtë që ofron shërbimi i onkologjisë në QSUT.
I lakuar si pavioni më problematik, onkologjiku pret çdo ditë qindra pacientë të sëmurë rëndë. I vetmi investim “i dukshëm” është lyerja para disa ditësh e fasadës.
“Repart i standardeve të larta evropiane, që sjell shembullin e radhës në rrugën tonë shumë të mundimshme të rilindjes së shëndetësisë, ku ka ende shumë më shumë për të bërë, po ku reforma tërësore ka nisur të japë rezultatet e para inkurajuese”, u shpreh Kryeministri i vendit Edi Rama ditën e përurimit të repartit të ri të akseleratorit linear.
Dhe përgjigjja e një lexuesi ishte: “Pikërisht në ditën e inaugurimit aparatura e kimioterapisë sot nuk funksiononte. Kësaj i thonë rilindje”.
Përurim u shoqërua edhe me një galeri fotosh tepër të bukura. Ndërkohë, “aparati” i “Shëndet+” sjell panoramën “pas fasadës”.
