Denisa Canameti / Shendeti.com.al
Një ngjarje e pakëndshme ka ndodhur sot në Poliklinikën e Specialiteteve numër 3 në Tiranë. Mjekja angiologe Elida Mici është vonuar 50 minuta, duke lënë pacientët në pritje pas derës. Kjo i ka revoltuar këta të fundit, të cilët kanë nxjerrë telefonin për të filmuar mbërritjen e doktoreshës në Poliklinikë.
Në videon e publikuar në rrjete sociale dëgjohet revolta e pacientëve të cilët nuk ngurrojnë të shkarkojnë ndjenja inati për pritjen e gjatë. “Nuk të presim ty sa të pish kafen, doktoreshë”, shprehen ata.
Videoja është komentuar edhe nga përdoruesit e rrjeteve sociale, të cilët ndahen në gjykimin e tyre sa i përket sjelljes së mjekes dhe arsyeve të largimit të saj në orar pune.
Për këtë çështje, gazeta “Shëndet+” kontaktoi drejtoreshën e Poliklinikës, Valdete Malajn.
“Jam në dijeni të lajmit. Largimi i mjekes është i dokumentuar në regjistër dhe unë si drejtuese e institucioni kam qenë në dijeni. Mjekja në atë orë ka qenë në një vizitë shtëpie. Vizitën në shtëpi mjekët e kanë detyrim të përcaktuar në kontratë. Më vjen keq që mediat bëhen të njëanshme në transmetimin e informacionit. Pacientët kanë të drejtat e tyre dhe ne i njohim ato. Por, duhet sqaruar edhe pozicioni i mjekut”, sqaron Malaj për “Shëndet+”./ https://shendeti.com.al/
