Denisa Canameti / Shendeti.com.al
SU “Shefqet Ndroqi” është bazë diagnostikuese, mjekuese, kërkimore shkencore dhe pedagogjike për sëmundjet e mushkërive dhe tuberkulozin.
Si i tillë, ky spital, nuk ka pasur nevojë për një ligj specifik që ndalon rreptësisht duhanin në ato ambiente. Kjo sepse është i njohur mirë efekti shkatërrues që duhani ka në shëndet, veçanërisht në mushkëri.
Megjithatë, pavarësisht kësaj, në auditimin e kryer nga Kontrolli i Lartë i Shtetit, spitali universitar “Shefqet Ndroqi” rezulton shkelës i ligjit antiduhan. Në raport thuhet se gjithashtu është vënë re një mungesë e shenjave të dukshme që tregojnë se pirja e duhanit në këto mjedise është rreptësisht e ndaluar.
“SUNSHNT është gjobitur nga Institutit i Shëndetit Publik me gjobë 300.000 lekë sepse në ambientet e spitalit ka konstatuar shkelje të ligjit nr.9636 datë 06.11.2006 “Për mbrojtjen e Shëndetit nga Produktet e Duhanit”.
“Më pas gjykata administrative ka nxjerrë urdhër ekzekutimi vendimi për t’u paguar nga spitali gjoba së bashkë me shpenzimet gjyqësore në vlerën 362,400 lekë. Me urdhrin nr.627 datë 07.12.2015, drejtori i SUSHNT ka urdhëruar kryerjen e kësaj pagese me urdhër shpenzimi nr.687 datë 09.12.2015 është kryer pagesa në vlerë 362, 400 lekë.
“Pra, nga veprimet apo mosveprimet e kryera nga drejtori i Spitalit në shkelje të këtij ligji, përveç sa i është shkaktuar buxhetit SUSHNT dëm ekonomik në vlerën 326, 400 lekë, tregon edhe për papërgjegjshmëri në kryerjen e detyrës, pasi ky institucion ka për objekt të punës parandalimin dhe kurimin e sëmundjeve të mushkërive, për të cilin duhet të ishte në pararojë dhe në shembull të respektimit të këtij ligji”, thuhet në raport./ https://shendeti.com.al/
