Blerina Bombaj, dietologe
Si rregull, preferohet që fëmijët dhe adoleshentët t’i marrin të gjithë lëndët ushqyese nëpërmjet ushqimit të freskët, të ekuilibruar mirë dhe të larmishëm.
Studimet tregojnë se marrja e lëndëve ushqyese në formë të veçuar nëpërmjet një suplementi nuk ka të njëjtin efekt sikurse të marra nga ushqimet pasi, në ushqime, vitaminat dhe mineralet vijnë në kombinime të atilla ku njëri ndihmon tjetrin, pra në një formë bashkëpunuese, e cila në gjuhen shkencore quhet “sinergji”.
Gjithsesi, shkenca tregon se fëmijët midis moshës 6 muaj dhe 5 vjeç mund të përfitojnë nga konsumi me pika i vitaminave A, C dhe D, si dhe hekurit, veçanërisht nëse ushqimi i tyre nuk është i larmishëm. Vitamina D sintetizohet në organizmin tonë nëpërmjet ekspozimit të drejtpërdrejtë të lëkurës në rreze dielli. Kur fëmijët rriten në ambiente të mbyllura dhe nuk dalin çdo ditë në diell, nuk konsumojnë ushqime të pasura në vitaminë D (peshq të kaltër, qumësht dhe vezë), është e nevojshme të plotësojnë nevojat ditore nëpërmjet suplementeve përkatës./ Shendeti.com.al/
