Kryeministri i vendit dhe ish-ministri i Shëndetësisë duket se e “kanë harruar” ligjin për të cilin ata kanë kërkuar me çdo kusht që të zbatohet: Ligjin Antiduhan.
Në një video të publikuar nga ish-deputeti Eduart Ndocaj shfaqen kryeministri Rama me ish-ministrin Beqaj në një tavolinë me disa persona të tjerë, ku njëri prej tyre është duke pirë duhan brenda ambienteve të një lokali.
Sipas një ligji të miratuar në vitin 2014, është e ndaluar pirja e duhanit në ambiente të mbyllura, ndërkohë që kush thyen ligjin gjobitet me 5000 lekë të reja për duhanpirësit dhe deri në 3 milionë për pronarët e lokaleve.
Kujtojmë se në vitin 2015, në Ditën Botërore Pa Duhan, ministri i asaj kohe i Shëndetësisë, Ilir Beqaj, është vlerësuar me Çmimin më të lartë dhënë nga Organizata Botërore e Shëndetësisë për kontrollin e duhanit, si shenjë e vlerësimit për përpjekjet në luftën kundër epidemisë së duhanit dhe për mbrojtjen e shëndetit publik.
