Përgatiti: Ilma Lamçe
Në këto ditë të nxehta flasim shpesh për kremin që duhet të përdorim për mbrojtjen nga dielli, si të nxihemi më shpejt, vajrat e duhur etj. Por, është shumë e rëndësishme të dimë pasojat nga qëndrimi i tepërt në diell.
Shqetësimet shfaqen nga një ekspozim për një kohë të gjatë në diell. Shkaku përcaktues nuk është, si në goditjen nga të nxehtët, temperatura e lartë, por veprimi i rrezeve të diellit, rrezet infra të kuqe dhe ultravjollcë në kokë.
Ajo përcaktohet nga ekspozimi i tepruar ndaj dritës së diellit. Njerëzit me lëkurë të bardhë janë më të ndjeshëm ndaj këtij problemi. Dhimbja e kokës, djersitja e shumtë dhe problemet me lëkurën janë disa nga pasojat. Karakteristikë e goditjes së diellit është djegia e shkallës I dhe II dhe eritema që rrjedh.
Ashpërsia e problemit varet nga koha e ekspozimit ndaj diellit dhe zonës në të cilën ka ndodhur. Në malet e larta ju mund të digjeni me lehtësi më të madhe dhe në më pak kohë për shkak të intensitetit të lartë të rrezatimit diellor.
Simptomat
-Eritema në pjesët e ekspozuara ndaj diellit e shoqëruar me formimin e flluskave.
-Në rastet më serioze shfaqen shpërthime të lëkurës.
-Skuqje të syve, lotim dhe bezdisje nga drita.
-Lëkura është e nxehtë dhe e djersitur, mund të shfaqen edhe ethet më vonë.
-Të përziera, marramendje dhe mpirje mendore.
Masat e para që duhen marrë janë:
-Transportoni personin në një mjedis të freskët dhe me hije.
-Vendosni akull në sqetull dhe kokë. Vetëm pas kësaj duhet të trajtohen lezionet e lëkurës me kremra anti-eritematoze ose spërkatje hidrokortizon.
Nëse goditja e diellit shoqërohet me simptoma më të rëndësishme, të tilla si djegia, ethet e larta, dhimbja e kokës ose të tjera, këshillohet të kërkoni këshilla mjekësore.
