Këto foto nuk janë marrë nga një qendër strehimi. Jemi në ambjentet e Spitalit të Traumës (apo ish-Spitali Ushtarak), në orën 00:00.
Në Spitalin e Traumës (Ish-spitali ushtarak) në mesnatë
“Keni shumë të drejtë, kjo gjendje është skandaloze, ne po mendojmë t’i strehojmë në ambjentet e një hoteli luksoz, me kondicioner, se e meritojnë”. Kjo ishte përgjigja ironike për “Shënet+” e mjekut të spitalit, të cilin e pyesim nëse kjo situatë është normale.
Gjatë kësaj vizite që kishte si qëllim vëzhgimin e kushteve dhe të shërbimit që bëhet në spital gjatë natës, arritëm të marrim ato pamje dhe një përgjigje ironike të mjekut roje dhe të infermieres.
Të afërmit e pacientëve as nuk ankohen për këtë gjendje. Mjafton të mos i nxjerrësh në foto dhe t’i lësh në qetësinë e tyre. Ata përpiqen të akomodohen me batanije nëpër korridore, nëpër shkallë, në kushte aspak të favorshme, pasi duhet t’u qëndrojnë mbi kokë gjatë natës familjarëve të tyre të shtruar në spital për arsye të ndryshme.
Nuk ka nevojë për vëzhgime të tepërta, nuk ka nevojë as të pyesësh, pasi është e dukshme që në këtë spital jo vetëm që nuk ka salla pritjeje, por nuk ka as stola nëpër korridore.
Në Spitalin e Traumës (Ish-spitali ushtarak) në mesnatë
“Shoqërimi i pacientëve nga të afërmit e tyre është i nevojshëm, pasi një mjek roje nuk mund t’i ketë në vëmendje të gjithë të sëmurët”, thotë njëra nga infermieret.
“Po ku të rrimë tjetër? Aman vetëm të dalim nga këto dyer”. Këto janë përgjigjet e pacientëve të cilët në kushte të tilla shprehen tepër të lodhur, saqë ngritja e zërit për disa stola pranë dyerve, duket luks i tepruar.
Ndoshta Ministria e Shëndetësisë ka arritur 300 ditë suksesi, megjithatë 300 netët, nuk duket të jenë të tilla.
