Një zyrtar nga Organizata Botërore e Shëndetit ka deklaruar ditën e sotme se dy anëtarë të stafit kanë rezultuar pozitiv për koronavirusin.
Organizata që po udhëheq luftën kundër koronavirusit globalisht njoftoi gjithashtu se të dy punonjësit filluan që të shfaqnin simptoma ndërsa ndodheshin në shtëpi dhe më pas u testuan. Lajmi për diagnostikimin e dy punonjësve të OBSH vjen shumë pak pasi zyra rajonale për Evropën theksoi se masa më të rrepta nevojiten në të gjitha vendet evropiane.
OBSH e quajti gjithashtu kontinentin e vjetër si “epiqendrën e re të pandemisë.”
Këto raste të reja të OBSH-së janë të parat në organizatën me bazë në Gjenevë dhe ndjekin një rast të konfirmuar në zyrën e Kombeve të Bashkuara në Gjenevë, si dhe një në Organizatën Botërore të Tregtisë javën e kaluar.
Nuk dihet ende nëse dy personat e infektuar ishin duke punuar me çështjen e Covid-19 në kohën që janë sëmurur.
