Blerina Bombaj, dietologe
Studimet tregojnë se nuk ka rëndësi vetëm të konsumojmë mëngjes, por edhe çfarë zgjedhim për të! Fjala “mëngjes” në anglisht do të thotë, thyej mosngrënien.
Trupi ynë i depoziton lëndët ushqyese në mënyrë që t’i përdorë ato edhe kur nuk ushqehet. Nata është e gjatë dhe këto depozita shterojnë.
Mëngjesi, vakti që thyen urinë
Gjatë një nate të tërë mosngrënieje, trupi ka përdorur pjesën më të madhe të sheqerit të depozituar. Gjatë natës turpi përdor energjinë e depozituar për të rikuperuar dhe rigjeneruar sistemet fiziologjike dhe indet. Në njëfarë mënyre, trupi “rinovohet” gjatë natës. Edhe pse është thënë shpesh se mëngjesi është vakti më i rëndësishëm, një pjesë e mirë e njerëzve, akoma dhe fëmijëve, e anashkalojnë.
Shumë prej nesh janë në presion kohor në mëngjes, por me pak planifikim gjithkush mund të gjej një zgjidhje të shëndetshme për vaktin e mëngjesit duke e përshtatur atë në stilin e jetesës së vet.
A është vërtet i rëndësishëm mëngjesi?
Po, përveçse një fillimi të mbarë për ditën, mëngjesi është një furnizim i mirë për trupin me lëndët e nevojshme ushqyese, si fribra, energji, vitamina, magnez dhe hekur. Studimet tregojnë se njerëzit që konsumojnë mëngjes, janë më të mirushqyer, kanë dietë më të ekuilibruar dhe peshë më të shëndetshme në krahasim me ata që nuk konsumojnë mëngjes. Ata kanë më shumë mundësi për të arritur një peshë optimale nëse janë mbipeshë dhe kanë më pak rrezik të preken nga sëmundje kardiovaskulare dhe diabeti.
Duke mos ngrënë mëngjes, jemi më të prirur të konsumojmë ushqime më pak të shëndetshme gjatë ditës. Konsumi i vaktit të mëngjesit rezulton gjithashtu në përmirësim të peshës trupore, të performancës mendore, të përqendrimit dhe kujtesës gjatë ditës.
