Ndryshimet e bëra në ligjin “Për kujdesin shëndetësor në Republikën e Shqipërisë”, të cilat parashikojnë sanksione për mjekët që nuk ndjekin edukimin në vazhdim, bien në kundërshtim me ligjin “Për Urdhrin e Mjekëve të Shqipërisë”. Deklarata vjen nga presidenti i UMSH-së, Din Abazaj, i cili shprehet se ndryshimet 
ligjore duhet të diskutohen me grupet e interesit. Gjithashtu, Abazaj nuk harron të theksojë se përgjegjësia për mungesën e krediteve nuk është vetëm e mjekëve, madje duhet parë se sa përgjegjësi kanë institucionet. Ai e konsideron pa vlerë faktin që rreth 1750 mjekë t’i nënshtrohen provimit të ricertifikimit.
“Duhet të nxirren konkluzione mbi rezultatet e ciklit që u mbyll. Domethënë duhet bërë një analizë se përse kemi këto rezultate të padëshiruara, me një numër kaq të konsiderueshëm mjekësh me kredite të paplotësuara apo me zero kredite.
“Pas konkluzioneve, duhet të nxirren përgjegjësitë: sa është përgjegjësia e institucioneve shëndetësore dhe sa është përgjegjësia e mjekëve. Kjo duhet bërë përpara se të mbahet qëndrim dhe të futësh mejekët në një provim ricertifikimi, që s’ka asnjë farë vlere për rritjen e tyre profesionale.
“Është e palogjishme që rreth 1500 mjekë me kredite të paplotësuara dhe rreth 250 mjekë me kredite zero t’i nënshtrohen provimit të ricertifikimit, i cili, në pikëpamjen e ngritjes profesionale dhe të edukimit të vazhdueshëm, s’ka asnjë vlerë”, tha ai./ Ola Mitre
