Agjencia Europiane e Barnave (AEB) ka autorizuar barnat Xevudy dhe Kineret, si dhe ka dhënë dritën jeshile për përdorimin e pilulës COVID-19 të Pfizer në raste emergjencash.
Komisioni Europian do të vendosë për miratimin përfundimtar për këto tre trajtime.
Çfarë dimë deri tani për ilaçet e COVID?
Ilaçi i antitrupave monoklonal Xevudy (sotrovimab), i cili është zhvilluar nga bashkëpunimi i gjigantit farmaceutik në Mbretërinë e Bashkuar, GlaxoSmithKline, me firmën amerikane Vir Biotechnology, “ul ndjeshëm mundësinë e shtrimit në spital dhe të humbjes së jetës te pacientët me një sëmundje dytësore”, tha AEB në një deklaratë, duke cituar studimin e saj.
Trajtimet me antitrupa monoklnal përbëhen nga proteina të krijuara në laborator që imitojnë reagimin e trupit ndaj infeksioneve. Xevudy është ilaçi i tretë i antitrupave monoklonal i miratuar nga AEB.
Kineret (anakinra), i cili prodhohet nga kompania suedeze Orphan Biovitrum me bazë në Stokholm, mund të “ulë dëmtimin e rrugëve të poshtme të frymëmarrjes, duke parandaluar zhvillimin e problemeve të rënda të frymëmarrjes”, deklaroi agjencia në një njoftim të veçantë për shtyp.
Rregullatori kryesor i barnave të BE-së autorizoi gjithashtu pilulën COVID-19 të Pfizer për përdorim në raste emergjencash, duke thënë se ilaçi “mund të përdoret për të trajtuar të rriturit me COVID-19 të cilët nuk kanë nevojë për oksigjen shtesë dhe që kanë rrezik të shtuar për të përparuar në stade të rënda të sëmundjes”.
Kjo pilulë, e njohur si Paxlovid, mbetet ende për t’u rishikuar plotësisht nga AEB.
“Paxlovid duhet të administrohet sa më shpejt që të jetë e mundur pas diagnostikimit të COVID-19 dhe brenda pesë ditëve nga fillimi i simptomave”, tha agjencia për këtë pilulë.
Miratimi përfundimtar për tre barnat varet nga Komisionit Europian. BE-ja ka autorizuar deri më tani gjashtë trajtime për COVID.
Dhënia e autorizimeve vjen në mes të shqetësimeve për Omicron
Këto autorizime vijnë në një kohë kur BE-ja përgatitet për një rritje të mundshme të rasteve nga varianti i sapozbuluar i virusit, Omicron. Sipas studimeve, Xevudy ka rezultuar të jetë efektiv kundër të gjitha mutacioneve të Omicron, së bashku me Paxlovid i cili gjithashtu pritet që të jetë në gjendje ta përballojë variantin e ri.
Franca të enjten kufizoi udhëtimet nga Mbretëria e Bashkuar dhe forcoi kontrollet e udhëtimeve nga shtetet e tjera të BE-së për shkak të shqetësimeve për Omicron.
Qendra Europiane për Parandalimin dhe Kontrollin e Sëmundjeve tha në fillim të kësaj jave se nevojiten “veprime të forta” për të përballuar përhapjen e variantit Omicron, si dhe pretendoi se vetëm vaksinat nuk janë të mjaftueshme për të frenuar një valë tjetër. /DW
