Denisa Canameti
“Ai dhe Ajo krijojnë jetën. Bëje botën portokalli”. Kjo ishte tema e aktivitetit të zhvilluar sot pranë maternitetit “Mbretëresha Geraldinë” në kuadër të fushatës ndërkombëtare “16 ditë aktivizëm kundër dhunës gjinore”, organizuar nga shoqata “Together for Life”, me mbështetjen e Agjencive të Kombeve të Bashkuara në Shqipëri.
Fushatës iu bashkua drejtori i maternitetit Blenard Nonaj, i gjithë stafi kryesisht mashkullor i maternitetit, si dhe përfaqësues të Kombeve të Bashkuara. Këtë aktivitet e nderuan me pjesëmarrjen e tyre edhe Shkëlqesia e tij, Princ Leka me Princeshën Elia. Prania e tyre i dha një tjetër frymë aktivitetit duke i shtuar më shumë jetë dhe forcë mesazhit të kësaj dite. Tjetër figurë e njohur e ekranit që erdhi në mbështetje të kësaj fushate ishte edhe Monika Stafa, gazetare e njohur. Ndërkohë, të rinjtë pjesëmarrës ngjyrosën portokalli hollin e maternitetit, aty ku u zhvillua edhe aktiviteti.
Mikpritësi i këtij aktiviteti, drejtori Blenard Nonaj, tha se: “Qëllimi i zhvillimit të këtij aktiviteti është të ndërgjegjësojmë qytetarët tanë se dhuna në familje dhe dhuna ndaj gruas është e patolerueshme. Kjo nuk është vetëm shkelje e të drejtave të tyre, por nënçmim ndaj familjes dhe mosvlerësim i kontributit që gruaja ka në mbarështimin e saj”. Nonaj u bëri thirrje të gjitha grave dhe burrave ta perceptojnë misionin e tyre si prindër në një kuptim më të gjerë: “Të sjellin në jetë jo vetëm një qenie të re njerëzore, por edhe modele të reja, të shëndetshme e të denja të marrëdhënieve bashkëshortore dhe familjare”.
Ndërkohë, Princi Leka shprehu mirënjohje për qëllimin e kësaj fushate që ka në fokus mbrojtjen e figurës së gruas, duke përmendur emrin e nderuar të Mbretëreshës Geraldinë, gjyshes së tij, si një figurë e rrallë femërore, tepër e dashur dhe me ndikim mbi publikun e gjerë. Gruaja që njihte fjalën dashuri dhe asnjëherë fjalën urrejtje.
Princeshë Elia, në fjalën e saj u shpreh se si femër nuk mund të qëndrojë e qetë duke ditur se sa gra, nëna, motra dhunohen dhe trafikohen. Që në krye të herës ajo iu referua në fjalën e saj grave të dhunuara të Kosovës. Gjithashtu, Princesha shprehu shqetësimin edhe për emrat e qeveritarëve të cilët lakohen si persona të inkriminuar në trafikimin e femrave. Duke folur për dhunë ajo tha: “Jam e bindur se kjo plagë shoqërore mund të luftohet vetëm kur të gjitha hallkat e shoqërisë të veprojnë të koordinuara dhe në mënyrë të përqendruar, kur liderët, drejtuesit e përgjithshëm, ministra e kryeministra, artistë, mësues dhe edukues, persona publikë e opinionistë, të gjithë bashkë të japin tonin e zero Tolerancës ndaj dhunës gjinore… Dashuria është antiteza e dhunës. Roli i gruas kundër saj merr një rëndësi akoma më të madhe në luftën kundër terrorizmit, fenomen ky që po preokupon sot të gjithë botën e qytetëruar. Një buzëqeshje, një falenderim, një fjalë e ngrohtë, do ta bënte jetën më të bukur, më gazmore, dhe me më shumë shpresë”.
Drejtori i qendrës së gruas, Albert Cakoni, u shpreh se “materniteti është një hap para në kujdesin ndaj gruas. Në këtë maternitet lindin 7000 jetë në vit. Mirëqenia e gruas është misioni i punës sonë. Ne gjithmonë japim mesazhe kundër dhunës dhe për një familje të shëndetshme. Do të dëshironim që e gjithë shoqëria të kishte ndaj gruas kujdesin dhe përkushtimin që ka stafi i maternitetit”.
Ndërkohë, vlerësimet maksimale për këtë aktivitet, ia dha Nora Kushti përfaqësuese e UNDP-së, e cila e cilësoi si aktivitetin më të bukur të mbajtur në emër të kësaj fushate.
Pas fjalëve përshëndetëse, pjesëmarrësit u ftuan që të shpërndajnë tufa me lule në dhomat e grave lehona, si gjest përmbyllës i këtij aktiviteti çelës.
