Pas urdhrit të Ministrit të Bujqësisë, Zhvillimit Rural dhe Administrimit të Ujërave, Edmond Panariti, Autoriteti Kombëtar i Ushqimit, në kuadër të sigurisë ushqimore, ndërmori sot një aksion në tregun e ish-Uzinës “Dinamo”, për kontrollin e përmbajtjes së nishestesë në nënproduktet e qumështit, djath e gjizë. Në mostrat e analizuara në vend rezultoi se vetëm një sasi djathi që tregtohej në një prej subjekteve, rezultoi me përmbajtje niseshteje. Por, nuk u morën masa disiplinore, pasi produkti në fjalë shoqërohej me etiketën përkatëse, ku njoftohej prania e saj në sasinë e djathit.
Drejtori i Drejtorisë së Menaxhimit të Riskut në AKU, Kreshnik Totaj dhe Drejtori i AKU-së së Tiranës, Taulant Kalo, deklaruan për mediat se veç kontrollit, iu demonstrua tregtarëve se si mund ta shikojnë në vend djathin dhe gjizën që mund të blejnë tek prodhuesit. Ndërkohë Totaj e Kalo shtuan se inspektimet do të jenë të përditshme në tregjet e mëdha e të vogla dhe nuk do të kenë asnjë tolerim ndaj subjekteve që shkelin ligjet dhe sigurinë ushqimore.
