Muajt e ardhshëm në Universitetin “Johns Hopkins” të Merilendit do të kryhet transplanti i parë i penisit në SHBA dhe do të kryhet tek një ushtar i luftës në Afganistan. Lajmi bëhet i ditur nga “New York Times”, ndërsa thuhet se ky transplant është kryer deri tani vetëm dy herë në gjithë botën, ndërsa vetëm një herë ka dalë me sukses: bëhet fjalë për rastin e një 21-vjeçari afrikanojugor që kohët e fundit është bërë baba.
Specialistët e qendrës prestigjioze amerikane kanë planifikuar që organin ta marrin nga një dhurues që ka vdekur dhe po kryejnë analizat mbi përzgjedhjen e personit që do të vihet në listë pritjeje për transplantin: mësohet se 1367 veteranë lufte të kthyer nga Iraku e Afganistani në vitet 2001-2013 kanë pësuar dëme në organet gjenitale, të tilla që kanë dëmtuar rëndë funksionet seksuale dhe urinare.
Procedura do të marrë 12 orë dhe mund të kryhet vetëm tek kandidatë me uretër të paprekur: gjatë ndërhyrjes kirurgët do të lidhin venat dhe arteriet e penisit të dhuruar me pacientin që do të pranojë organin: fundet e nervave të pacientit duhet të rriten me ritmin 2,5 cm në muaj. Pacienti duhet të rifitojë kështu funksionet seksuale dhe të mund të ketë fëmijë.
Pacientët që i nënshtrohen këtij transplanti duhet të marrin përgjatë gjithë jetës ilaçe në mënyrë që trupi të mos refuzojë organin e ri.
Specialistët e Universitetit me në krye drejtorin e kirurgjisë plastike rindërtuese Andrju Li kanë marrë lejen për të kryer 60 procedura të këtij lloji. / Përgatiti për “Shëndet+”: Gridi Shehu
