Aktorja amerikane Debbie Reynolds ka ndërruar jetë një ditë pas vdekjes së vajzës së saj, Carrie Fisher. Mediat amerikane raportojnë vdekjen e 84-vjeçares pasi ka pësuar një goditje në zemër. Ajo u dërgua në një spital të Los Anxhelos, por nuk arriti të qëndronte në jetë. Ndërsa një ditë më parë vdiq pas një ataku kardiak në një avion vajza e saj, Carrie Fisher.
“Ajo donte të ishte së bashku me Carrie,” tha djali i saj, Todd Fisher, pas publikimit të lajmit të vdekjes së nënës së tij.
Të martën Reynolds kishte postuar në Facebook një deklaratë në lidhje me vdekjen e vajzës së saj.
“Faleminderit të gjithëve që kanë vlerësuar talentet e vajzës sime të dashur dhe të mahnitshme. Unë jam mirënjohëse për mendimet tuaja dhe lutjet që tani janë udhëzuese për të ndaluar dhimbjen time”.
Reynolds ka marrë çmimin aktorja më e mirë në Academy Award në 1964-n. Në vitin 2015, asaj iu dha një çmim për arritje jetësore. Për marrjen e çmimit u paraqit vajza e saj.
Reynolds u martua me këngëtarin Eddie Fisher në vitin 1955 dhe kishte dy fëmijë, Carrie dhe Todd. Çifti u divorcua në vitin 1959.
Historia e Fisher me betejat e saj me përdorimin e drogës prishi dhe marrëdhëniet e saj me nënën, ndonjëherë të tensionuara. Debbie Reynolds dhe vajza e saj Carrie Fisher nuk kanë folur me njëra-tjetrën për shumë vite, por më vonë gjendja u kthye normalitetit dhe u pajtuan dhe qëndruan bashkë njëra-tjetrës.
Në një intervistë muajin e kaluar me radion amerikane NPR, Fisher foli për marrëdhënien e tyre. “Ajo është një grua jashtëzakonisht e fuqishme dhe unë e admiroj nënën time”, kishte thënë ajo.
