Tre vjet më parë, parlamenti australian u bë i pari në botë që miratoi ligjin që i hapte dritë jeshile përdorimit të grafikave paralajmëruese për rreziqet e duhanit në paketat e cigareve.
Sipas ligjit të miratuar në 2011, paketat paraqesin të njëjtat imazhe dhe ndryshojnë vetëm nga markat. Përpjekja për të arritur në miratimin e këtij ligji zgjati të paktën dy vjet dhe në fund të vitit 2012, pamjet reale të dëmeve që shkakton konsumi i duhanit në organet e përdoruesve “pushtuan” ambalazhet e cigareve.
Fushata që u finalizua me ndryshimet në ligj nuk ishte e lehtë, për shkak të përpjekjeve penguese të kompanive të mëdha që prodhojnë duhanin.
Dy vjet më pas, studimet tregojnë se numri i duhanpirësve në Australi ka rënë me të paktën 3 për qind, ndërsa konsumatorët që kërkojnë asistencë për lënien e duhanit në linjën e krijuar enkas për këtë qëllim (Quitline) janë rritur me 80 për qind. / Pa biletë
