Listës së barnave me rimbursim i është shtuar edhe ilaçi për kurimin e sëmundjes së Hepatit C, ‘Sofosbuvir’. Përfaqësues të Ministrisë së Shëndetësisë konfirmuan për mediat se është miratuar përfshirja e këtij medikamenti në listën e ilaçeve të rimbursueshme, i cili kushton shumë shtrenjtë në farmaci.
Ministria e Shëndetësisë nuk e ka përpiluar akoma listën përfundimtare të ilaçeve që do të përfshihen në rimbursim për këtë vit, megjithatë ka konfirmuar se do t’u kushtojë më shumë rëndësi sëmundjeve tumorale dhe hipertensionit, duke pasur parasysh numrin e lartë të të prekurve nga këto patologji.
Po ashtu, pritet të ketë një zgjerim të numrit të ilaçeve, që mbulohen plotësisht apo tërësisht nga shteti, por duke qenë se ende nuk ka një vendim përfundimtar, nuk mund të thuhen emrat e tyre. Sipas të dhënave të MSH-së, aktualisht shqiptarët paguajnë 30% më pak për barnat, ndërsa nga viti 2013, në listën e barnave me rimbursim janë shtuar 85 barna.
“150 000 qytetarë shqiptarë përfitojnë çdo ditë nga mjekimi me barnat e reja të shtuara në listën e rimbursimit. Po ashtu, ata janë çliruar nga barra e TVSH-së 10% për barnat, dhe 20% shërbimet shëndetësore dhe materialet mjekësore të implantueshme”, shton MSH./ https://shendeti.com.al/
Lexoni – Hepatiti C, transmetimi dhe shenjat.
